Este ano o Parque Arqueolóxico de Arte Rupestre de Campo Lameiro, institución dependente da Consellería de Cultura, Educación e Universidade da Xunta de Galicia, deseñou unha programación especial que pretende axudar a consolidar a imaxe de Campo Lameiro como un destino de referencia no ámbito do turismo rural, seguindo os pasos das outras localidades gañadoras do título de Capital do Turismo Rural 2023 de Escapada Rural como Cazorla ou Potes.

No caso de Campo Lameiro, o compoñente que lle outorgou un valor diferencial que lle posibilitou acadar esta distinción foi a súa condición de ser unha das tres capitais de arte rupestre ao aire libre en Europa e, sen ningunha dúbida, a capital dos petroglifos en Galicia.

Acercando a arte rupestre de Galicia a todo o mundo

A programación pretende cubrir todas as franxas de idade e intereses, chegando principalmente ao público familiar e aquelas persoas interesadas en experiencias relacionadas co turismo cultural, o que inclúe, ademais, eventos destacados como o concerto de Carlos Núñez ou o Festival de Arte Rupestre “LAEROS”.

Neste sentido, as familias atoparán unha serie de actividades de martes a sábado, principalmente pola mañá, con renovados obradoiros de arqueoloxía experimental ás 11:15 h., como “Ídolos” ou “Pintura”, que se poden continuar cunha visita guiada familiar e interactiva ás 12:30 h. . Pola tarde, ás 16:30 horas, temos outra oportunidade cun Escape Room familiar polo interior do Centro de Interpretación. Os máis mozos recibirán un premio especial por participar e entrarán no sorteo dunha cesta de produtos da tenda.

O público xeral desfrutará de varias visitas guiadas de martes a domingo (12:30-18:00-19:30 h.), e terá a ocasión de experimentar como son os petroglifos pola noite, baixo o sistema especial de luces LED da área arqueolóxica, coa actividade de “Noitepedras de lendas”, que alcanza a súa oitava edición. Como novidade ofrecemos un novo concepto de “turismo slow” con dúas novas propostas, “Ioga entre petroglifos” todos os sábados ás 11:00 h., e “Baños de Bosque”, que se celebrarán o 21 de xullo e o 24 de agosto.

Por último, entre os eventos máis destacados do verán temos que mencionar o singular concerto de Carlos Núñez, o 9 de xullo, dentro da súa xira de “Lugares Máxicos”. E a segunda edición do Festival da Arte Rupestre de Galicia coñecido pola denominación de “LAEROS”, un evento para vivir a historia con diversas actividades relacionadas coa música, a arqueoloxía experimental e a gastronomía.

O horario de acceso ao Parque no verán é de 11:00-21:00 horas. Reservas en liña na páxina web: www.paar.es ou no teléfono 886151195.

O Parque Arqueolóxico da Arte Rupestre de Campo Lameiro celebrará o próximo sábado 20 de maio a III edición da xornada Cazadores de Petróglifos que ten como propósito divulgar proxectos e estudos recentes da arte rupestre de Galicia.

Mediante diferentes charlas, tanto do eido académico como do dos colectivos, o público asistente terá a oportunidade de coñecer diferentes traballos da man dos seus principais protagonistas.

A primeira charla será ás 10.30 horas, da man de Tania Mosquera, doutoranda no Grupo de Estudos para a Prehistoria do Noroeste Ibérico-Arqueoloxía, Antigüidade e Territorio  na Universidade de Santiago de Compostela. Coa súa charla Cova Eirós e a arte rupestre das derradeiras sociedades cazadoras-recolectoras poderemos coñecer as investigacións máis recentes das manifestacións gráficas do final do Paleolítico desta cavidade situada en Triacastela (Lugo).

A segunda ponencia será levada a cabo por Miguel Carrero, doutor en Prehistoria e docente na USC, especializado na aplicación de tecnoloxías xeoespaciais en arqueoloxía. Na súa charla, O Megalitismo galego: ocupación do territorio e pensamento simbólico, expoñerá como Galicia é un dos territorios da Península Ibérica con maior densidade de mámoas, moitas delas con gravados e pinturas documentadas que testemuñan un rico e interesante mundo funerario na época.

A continuación, o arqueólogo David Fernández Abella, investigador do grupo EcoPast da USC, dará a ponencia Homes de papel en barcos de pedra. Naviformes no Noroeste, na que recompilará os petróglifos máis coñecidos con barcos identificados e expoñerá a información que se pode extraer destes gravados no apartado interpretativo.  

Tras un tempo de preguntas e debate, pola tarde retómase a xornada ás 16.30 horas.

Antón Bouzas e Luis Leclere, do Colectivo A Rula, compartirán o seu traballo recente na Quenlla dos Carballos (A Estrada), un espazo sacro cun uso moi prolongado ao longo do tempo, comezando no período Calcolítico ou Bronce Inicial ata o século I da nosa era, segundo se desprende do exame dunha inscrición votiva dedicada á deusa Diana, posiblemente un lugar de culto precristián. O título da charla é A Quenlla dos Carballos no concello da Estrada. Un santuario rupestre cunha dedicatoria á deusa Diana na ribeira do Ulla.

Rafael Quintía, presidente da Asociación Antropolóxica Galega e docente na UNED, expoñerá a súa investigación de moitos anos como antropólogo recollendo e divulgando o patrimonio inmaterial vinculado aos petróglifos galegos, que reflicten unha valiosa mostra de construción cultural da paisaxe e da historia para dar sentido a un pasado descoñecido. Na ponencia A arte rupestre e o patrimonio inmaterial, fará un percorrido polos universos simbólicos vencellados aos nosos gravados e aos relatos transmitidos oralmente ao redor deles de xeración en xeración.

Para finalizar as charlas, Fátima Martínez e Patricia Novas, do Departamento de Didáctica e Formación do Parque Arqueolóxico da Arte Rupestre, expoñerán o traballo que se leva a cabo neste centro de referencia na divulgación da Arte Rupestre galega entre o público escolar. Co título Divulgando os petróglifos: experiencia didáctica do PAAR, compartirán o que consideran as chaves para lograr un discurso no que o alumnado comprenda o valor do patrimonio prehistórico.

O prezo é de 15 euros e se emite un certificado de participación de 8 horas.

Puede consultar el programa:

Descargar el programa de la III edición de Cazador@s de Petróglifos

Para anotarse en la jornada, hasta el día 18 de mayo, en el siguiente enlace:

Formulario de inscripción en la III edición de Cazador@s de Petroglifos

Más información en el teléfono 886151195 o en el correo formacion@paar.es

“LAEROS”, definido como un festival da arte rupestre, está organizado polo Concello de Campo Lameiro e conta coa colaboración do Parque Arqueolóxico da Arte Rupestre (PAAR) que terá un papel fundamental na coordinación desta xornada de exaltación de Campo Lameiro como destino turístico e arqueolóxico de vital importancia para Galicia.

TALLERES FAMILIARES “INVERNÍA” 

O Parque Arqueolóxico da Arte Rupestre de Campo Lameiro (PAAR) organiza o “II CONCURSO FOTOGRÁFICO ENFOQUES RUPESTRES”. O obxectivo deste concurso é a promoción e difusión da arte rupestre de Campo Lameiro, a capital da arte rupestre de Galicia, entre os usuarios das redes sociais Facebook, Instagram e Twitter. #EnfoquesRupestres2021

BASES DO CONCURSO
1. Poderán participar no presente concurso calquera persoa física que durante o período de validez da presente campaña participe na acción segundo se propón nos termos descritos nestas bases.
2. A participación no concurso é gratuíta e non require inscrición.
3. O período de recepción de fotografías vai dende o día 15 de Xullo de 2021 ata o día 15 de Agosto de 2021, ambos inclusive.
4. Para que unha fotografía entre en concurso debe seguir os seguintes pasos:
a) Facer unha foto dos petróglifos de Campo Lameiro e a súa contorna e enviala ao enderezo info@paar.es, xunto cos seus datos persoais de contacto (nome e teléfono).
b) A fotografía dixital non pode exceder os 9.9 Mb de tamaño.
5. Aquelas persoas que non realicen tódolos pasos obrigatorios ou o fagan de forma errónea, a criterio da organización, non poderán optar ao premio na presente convocatoria.
6. As persoas participantes poderán enviar tantas fotos como desexen, aínda que non se terá en conta a cantidade das mesmas, senón a calidade de cada una delas, de forma individual.
7. Unha vez finalizado o prazo de presentación de fotos, a organización fará unha selección das 10 mellores fotografías. Para a súa elección valorarase, entre outras características, a calidade, a creatividade, orixinalidade, a estética, valorando especialmente o ter potenciado os valores patrimoniais arqueolóxicos, artísticos, antropolóxicos e/ou paisaxísticos da arte rupestre de Campo Lameiro. Estas dez instantáneas subiranse ás redes sociais oficiais do PAAR (Facebook, Instagram e Twitter) e aquelas que obteñan un maior número de “gústame” no prazo indicado serán as fotografías gañadoras do concurso, co 1º, 2º e 3º posto en relación correlativa ao número de “gústame”.
8. A organización do concurso resérvase o dereito de anular o presente concurso, suspendelo, ou ben cambiar algunhas das súas condicións se por causas técnicas ou de calquera outra natureza allea á súa vontade non puidera cumprir co normal desenvolvemento do mesmo, segundo o establecido nas presentes bases.
9. As persoas concursantes ceden os dereitos de imaxe das súas fotografías o Parque Arqueolóxico da Arte Rupestre de Campo Lameiro e o Concello de Campo Lameiro.
10. A participación no concurso implica a total aceptación das presentes bases e das posibles decisións que adopte a organización.

PREMIOS
11. Os premios son os seguintes:
1º Premio: premio en metálico de 100€
2º Premio: premio en metálico de 75€
3ª Premio: premio en metálico de 50€

12. As fotografías finalistas serán seleccionadas nun prazo de 15 días á finalización do concurso e anunciaranse a través das redes sociais oficiais do PAAR de Facebook, Instagram e Twitter o 1 de setembro, polo que se recomenda seguir as contas regularmente.
13. Establécese o prazo entre o 1 de setembro á hora de publicación e o 15 de setembro ás 00.00 como período no que se poden realizar interaccións “gústame” no Facebook, Instagram e Twitter oficiais do PAAR. Rematado este prazo, resultarán gañadoras as fotografías que obtiveran un maior número de “gústame”.
14. A organización porase en contacto coas persoas gañadoras a través do teléfono facilitado unha vez rematado o prazo de votación.
15. Dentro dos 15 días seguintes á finalización do concurso, crearase un álbum na páxina de Facebook do PAAR e doutras redes sociais cunha selección das fotos recibidas incluídas as gañadoras.

PROTECCIÓN DE DATOS DE CARÁCTER PERSOAL
16. As persoas participantes aceptan, mediante a súa participación no concurso, que os contidos e comentarios que vaian ser publicados en Facebook e Instagram poidan ser compartidos co resto de usuarios de Facebook e doutras redes sociais.
17. Non é necesario rexistro previo en ningunha aplicación, nin a organización vai recoller dato ningún de inscrición posto que a participación é pública e gratuíta. Excepto no caso dos gañadores; que, para a entrega dos premios, se recollerán os seus datos persoais.

RESPONSABILIDADES
18. A organización resérvase o dereito de denunciar e pedir a eliminación da fotografía, se algunha imaxe vulnera dereitos intelectuais, persoais, resulta ofensiva ou discriminatoria.
19. A organización resérvase o dereito de denunciar e pedir a eliminación de calquera comentario, se algún deles vulnera dereitos persoais, resulta ofensivo ou discriminatorio.
20. A organización resérvase o dereito de anular calquera participación ou a calquera participante, se se teñen sospeitas dunha manipulación incorrecta dos datos ou do concurso.
21. A organización resérvase o dereito de rexeitar ou excluír da participación do concurso a calquera participante que non reúna os requisitos descritos nas presentes bases e os seus termos de participación ou contraveña as normas ou finalidade do concurso.
22. A organización non se responsabiliza das posibles perdas de datos por problemas e/ou mal funcionamento das redes sociais ou da internet. Ademais a organización exclúe calquera responsabilidade polos danos e prexuízos de toda natureza que, a pesar das medidas de seguridade adoptadas, puideran deberse á utilización indebida dos servizos e dos contidos por parte dos usuarios/as, e, en particular, aínda que non de forma exclusiva, polos danos e prexuízos de toda natureza que poidan deberse á suplantación de personalidade dun/unha terceiro/a efectuada por un/unha usuario/a en calquera clase de comunicación realizada a través do portal.
23. Igualmente, a organización exclúe toda responsabilidade polos danos e prexuízos de calquera natureza que puidera deberse ao uso indebido, manipulación ou mutilación que os usuarios/as ou terceiros/as non autorizados/as puideran realizar ao respecto do contido xeral da presente páxina, así como da vulneración dos dereitos da propiedade intelectual que puidera producirse.

En Campo Lameiro, 14 de xullo de 2021. Parque Arqueolóxico da Arte Rupestre de Campo Lameiro.