O Parque Arqueolóxico da Arte Rupestre (PAAR) de Campo Lameiro acollerá os días 20 e 21 de setembro as I Xornadas Internacionais da Arte Rupestre Atlántica, unha iniciativa que traerá persoas especialistas no mundo dos petróglifos de Irlanda, Escocia, Portugal e Galicia. As xornadas están organizadas pola Consellería de Cultura, Lingua e Xuventude da Xunta de Galicia.

A Arte Rupestre Atlántica representa un patrimonio compartido que conecta Galicia, Portugal e as Illas Británicas a través de expresións culturais e simbólicas comúns da Prehistoria. Esta iniciativa ten como finalidade promover un espazo de cooperación entre universidades, museos, centros de interpretación e colectivos especializados, co obxectivo de afianzar o papel de Galicia como un territorio de referencia na investigación, protección e divulgación desta tipoloxía de arte rupestre.

Programa e relatorios destacados

As xornadas contarán cunha serie de obradoiros, charlas e conferencias impartidas por expertos de renome internacional.

Sábado, 20 de setembro: Obradoiros e Seminarios A xornada do sábado está centrada en actividades prácticas e de campo.

• Obradoiro de Restauración da Arte Rupestre: Alejandro Javier Pujales, conservador-restaurador especializado en Arqueoloxía, abordará a investigación e aplicación de métodos para o control de liques e musgos en petróglifos.
• Obradoiro de Rexistro e Fotogrametría 3D: O grupo GEPN-AAT da Universidade de Santiago de Compostela, integrado por Alia Vázquez-Martínez, Miguel Carrero Pazos e Alexis Maldonado Ruiz, presentará un proxecto de fotogrametría para a documentación da arte rupestre de Campo Lameiro.
• Visita guiada e nocturna: O programa inclúe unha visita en microbús polos petróglifos estudados por Ramón Sobrino Buhigas e Sobrino Lorenzo nos concellos de Campo Lameiro e Cerdedo-Cotobade. Ademais, haberá unha visita especial nocturna aos petróglifos do PAAR.

Domingo, 21 de setembro: Charlas e Conferencias O domingo será o día das conferencias, con intervencións sobre as últimas investigacións e a conservación da arte rupestre.

• Xosé-Lois Armada (INCIPIT-CSIC) falará sobre “As conexións Atlánticas durante a Idade do Bronce”.
• Joana Valdez-Tullet (Durham University) presentará un relatorio sobre o pasado, presente e futuro da arte rupestre atlántica.
• Elizabeth Shee Twohig (University College Cork), experta en arte rupestre atlántica e arqueoloxía do Neolítico e da Idade do Bronce en Irlanda, intervirá sobre a continuidade e transformacións na arte megalítica irlandesa.
• Fernando Carrera, ex director da Escola de Restauración de Bens Culturais de Pontevedra, compartirá reflexións sobre a conservación da arte rupestre.
• Elena Cabrejas (INCIPIT-CSIC) presentará o proxecto “Laxe dos Bolos, o coloso descoñecido da Arte Rupestre Atlántica”.
• Sofía Figueiredo-Persson (Universidade NOVA de Lisboa) centrarase na mediación cultural a través de imaxes e experiencias.

O evento pecharase cunha mesa redonda que permitirá identificar liñas de cooperación e fortalecer redes internacionais para a documentación e conservación do patrimonio rupestre. Ademais haberá unha visita guiada para coñecer de preto o Parque Arqueolóxico da Arte Rupestre.

AQUÍ PODES DESCARGAR O PROGRAMA COMPLETO 

Inscríbete! 

Podes participar só o sábado? Só o domingo? Queres vir os dous días? Non hai problema!

Fai a túa reserva de maneira gratuíta escollendo os días que poidas vir. Hai un número limitado de inscricións, así que non demores a túa inscrición!

 Reserva aquí! 

Se tes dúbidas co programa ou coa inscrición consulta connosco no +34 886 151 195 ou en info@paar.es

Abril, Faia, Maruxa Coralia Djs e a maxia de Samuel Moreno compoñen o cartel deste festival de espectáculos en pequeno formato, a pé de terra, sen escenarios, que se alóngase desde a mañá ao solpor, pensado para todos os públicos

O Parque Arqueolóxico da Arte Rupestre (PAAR), situado en Campo Lameiro – Pontevedra, converterase o vindeiro sábado 26 de xullo nunha auténtica romaría cultural coa celebración da primeira edición do Petrofest. Este festival diúrno ofrecerá unha xornada única e gratuíta de música, baile e maxia en plena natureza, entre petróglifos milenarios, carballos e piñeiros.

A entrada ao recinto e ao festival será libre e gratuíta, sen necesidade de reserva previa, agás para as visitas guiadas que se realizarán ao longo do día e que requiren inscrición. O evento promete unha experiencia inesquecible onde o patrimonio, a cultura e a diversión se entrelazan.

As portas do PAAR abriranse ás 11:00h, dando comezo a unha programación variada e pensada para todos os públicos:

• 12:00h – “Danza entre petróglifos”: Iniciación ao baile tradicional galego con María Montero. Cunha fonda experiencia en Cantigas e Agarimos, actualmente tamén forma parte do elenco habitual da compañía de danza de Fran Sieira. Ofrecerá unha introdución ao baile tradicional para poder practicar despois no concerto de Abril.  
• 13:00h – Concerto de Abril: Nun claro do bosque, ao carón do labirinto da Área Arqueolóxica, o dúo composto por Claudia Abril (voz e percusións) e Marina Carpente (violín e voz) ofrecerá unha proposta de folk contemporáneo. Melodías tradicionais galegas e ibéricas adaptadas a sonoridades actuais, creando un microcosmos folclórico cheo de intimidade, personalidade e frescura.
• 14:00h – Sesión de Maruxa e Coralia Djs: Paula e Tamara, baixo o nome de Maruxa e Coralia farán vibrar o PAAR coa súa selección de música galega e en galego. A súa sesión, fresca e alternativa, mesturará xéneros como o rock, a cumbia, a electrónica, o pop ou o trap..
• De 16:00h a 18:00h – Xogos Rupestres: Actividades lúdicas para todas as idades, deseñadas para coñecer de forma divertida a época dos petróglifos.
• 18:00h – Maxia con Samuel Moreno: O mago galego, semifinalista de Got Talent España, abraiará aos visitantes cun espectáculo moderno, fresco e xuvenil.
• 20:00h – Concerto de Faia: A romaría culminará nun concerto íntimo e moi especial no icónico lugar da Laxe dos Carballos. Faia Díaz, xunto á harpa de Bleuenn Le Friec, reinterpretará as melodías do folclore galego nun ambiente relaxado, co sol poñéndose sobre o gran cervo gravado na rocha, un lugar xa empregado por Carlos Núñez nos seus ciclos de “Lugares Máxicos”. Faia, recoñecida co Premio Martín Códax da Música 2025 ao Mellor Proxecto de Música Tradicional pola súa obra ‘Alvela’, ofrecerá unha actuación que fusiona sons de raíz con experimentación sonora.

Actividades Complementarias e Servizos:

Ao longo do día, os asistentes tamén poderán gozar doutras propostas do PAAR:

• Visitas Guiadas aos petróglifos: Haberá pases ás 12:00h, 17:30h e 19:00h. Estas visitas, as únicas que requiren reserva previa e adquisición de billete a través da web paar.es, permitirán coñecer en profundidade os petróglifos máis destacados, a época na que se vivía e os seus enigmáticos significados.
• Cantina Rupestre: Dispoñible durante todo o festival para o xantar campestre e bebidas.

O Petrofest en Campo Lameiro promete unha xornada excepcional para conectar coa historia, a natureza e a cultura galega a través da música, a danza e a maxia, nunha contorna patrimonial única en Europa.

O Parque Arqueolóxico da Arte Rupestre (PAAR), o maior centro de Galicia para comprender os enigmáticos petróglifos, súmase á celebración dos Días Europeos da Arqueoloxía (JEA) que terán lugar os días 13, 14 e 15 de xuño de 2025. Unha oportunidade única para que o público de todas as idades se achegue á historia e á investigación arqueolóxica.

Os Días Europeos da Arqueoloxía son un evento promovido polo Ministerio de Cultura francés, á que se sumaron os países membros do Consello de Europa, e coordinado polo Instituto Nacional de Investigacións Arqueolóxicas Preventivas (Inrap), que mobiliza a máis de 5000 eventos en 30 países. O seu obxectivo principal é concienciar aos cidadáns sobre a riqueza e diversidade do patrimonio arqueolóxico europeo, así como a necesidade de protexelo. En Galicia o PAAR é un dos axentes principais destas xornadas desde o seu comezo.

Programación no PAAR para toda a fin de semana

O Parque Arqueolóxico da Arte Rupestre ofrece unha variada programación durante estas tres xornadas, deseñada para mergullar aos visitantes na prehistoria e no fascinante mundo dos petróglifos e da arqueoloxía.

“De caza!”: Unha experiencia teórico-práctica para aprender as técnicas de caza dos nosos devanceiros e as súas armas. Os participantes poderán practicar o uso do arco, frechas, propulsor e azagaia. Sábado 14, de 11:00 a 12:00. Todos os públicos.

Visita guiada á Área Arqueolóxica: Acompañados por especialistas, os visitantes descubrirán os principais puntos da Área Arqueolóxica do Parque e a recreación do poboado da Idade do Bronce, desvelando os enigmáticos significados dos gravados na pedra.  Venres 13, Sábado 14 e Domingo 15 de xuño, de 12:30 a 13:30 e de 17:30 a 18:30. Todos os públicos.

Escape room: “O tesouro da moura”: Unha divertida aventura para nenos e familias, onde seguirán pistas e resolverán probas para recuperar o tesouro da lendaria moura de Campo Lameiro. Sábado 14 e Domingo 15 de xuño, de 16:00 a 17:00. Público familiar

Xogo interactivo: “Petroaventura”: Un xogo interactivo para aprender e pasear pola gran reserva natural e arqueolóxica do PAAR. Sábado 14 e Domingo 15 de xuño. Público familiar.

Os Días Europeos da Arqueoloxía son unha oportunidade excelente para achegarse ao patrimonio cultural, comprender a cadea operativa da arqueoloxía “da escavación ao museo” e fomentar o intercambio de coñecementos entre profesionais e cidadáns europeos.

Todas as actividades teñen prazas limitadas

 Reserva agora 

Este sábado 17 e domingo 18 de maio, o Parque Arqueolóxico da Arte Rupestre (PAAR) énchese de actividade para conmemorar dúas datas sinaladas: o Día das Letras Galegas e o Día Internacional dos Museos. E para celebralo ao grande, o acceso ao parque será gratuíto durante toda a fin de semana! Convidámoste a mergullarte na historia e na cultura a través dunha oferta de experiencias únicas deseñadas para todas as idades.

• 🧭 Xogos de Orientación: Petroventura Explora os recunchos do noso parque dun xeito diferente! Participa nos nosos apaixonantes xogos de orientación e pon a proba as túas habilidades mentres descobres os segredos da nosa área arqueolóxica.

• 🧩 Escape Room “O Tesouro da Moura”: Atréveste a resolver o enigma? O noso escape room “O Tesouro da Moura” desafíache a converterte nun auténtico buscador de obxectos perdidos e a desvelar misterios ancestrais. 

• 🤚 Obradoiro “Amuletos con Historia” Deixa voar a túa creatividade no noso obradoiro práctico. Aprende a fabricar os teus propios ídolos inspirados na prehistoria e leva contigo un amuleto cargado de significado.

• 🐍 Visita nocturna especial “Noites no PAAR – Lendas e Letras Galegas” Ao caer o sol, vive unha experiencia máxica. Acompáñanos nun percorrido nocturno onde as lendas máis cativadoras da tradición oral galega, vinculadas aos petróglifos, cobrarán vida baixo as estrelas.

Reserva agora 

Esta Semana Santa, atrévete a vivir unha experiencia única no maior centro arqueolóxico de Galicia! Nas Terras de Pontevedra, agóchase unha sorpresa que te transportará á prehistoria. Imaxina cazar como un auténtico habitante da Idade de Bronce, ou descubrir a maxia dos petróglifos baixo a luz das lanternas en noites cheas de lendas. No Parque Arqueolóxico da Arte Rupestre, queremos ofrecerche o plan máis orixinal para estas vacacións: unha aventura inesquecible a través do tempo.

Queres ver todo o que temos previsto para ti?

Reserva agora